Fyrirlestur um táknmálsskilning heyrnarlausra
Miðvikudaginn 30. júní kl.10:00-12:00 heldur Isabel de los Reyes Rodríguez Ortiz, Sálfræðideild Háskólans í Sevilla á Spáni, fyrirlestur sem nefnist Sign Language Comprehension in Deaf People eða Táknmálsskilningur heyrnarlausra. Fyrirlesturinn er haldinn á vegum spænskudeildar Háskóla Íslands og Stofnunar Vigdísar Finnbogadóttur í erlendum tungumálum og fer fram í Gimli, stofu 102.
Í fyrirlestrinum verður reynt að svara spurningunni um það hversu mikið heyrnarlausir nemendur skilja af því sem er táknmálstúlkað. Táknmálsskilningur heyrnarlausra er yfirleitt ágætur í þessum aðstæðum en ekki eins góður og hjá heyrandi táknurum. Litið er á áhrif aldurs og aðstæðna þegar táknmál er lært.
Fyrirlesturinn er haldinn á spænsku en verður túlkaður yfir á íslensku og íslenskt táknmál.
